Erdalin ibas kendit Kinderan, idah si Adjar Taki idas oeroek-oeroek Goeng Daholi: “Oh si ngoeda-ngoeda djah kal ngë si ‘rdalin doea kalak, arah ëndalah ia idjemba-djemba bëgoe bapa, bëgoe nandë, maka akoe ertoetoer; man belo pë Iang akoe enda, man pë Iang, di ertoetoer akoe kari ë man silangen,” atë si Adjar Taki.
“Kai ng’ah ‘ndia, teman,” nina beroe Ginting, “ibas oeroek-oeroek Goeng Daholi?” “Tongkeh gia ningen, la lït djoema rabïn idatas; di djombing-djombing ningen gia, la lït djoema man boerön; ia, ipa-ipa ningen gia, la lït moesoeh. E, djelma, djelma koetera ngë “ndia?”
Sambungan dari Bahagian Kesatu
E, ngadi m’ ija, beroe Karo ras toerang, beroe Ginting.
“Katikai djelma idas oeroek-oeroek ë, goeroe kap këna,” nina beroe Ginting ngata beroe Karo.
“Goeroe toehoe”.
“Ia! goeroe maka katikaï.”
E, ikatikaïna djelma idas oeroek Goeng Daholi. “Oh, djelma radja, di la pë radja, penggoeal, di lang, persaroenë, djelma si koe djoema sëa, djelma erdjabaten adah maka bantji, nina katika.”
“E, maka sidahi teman.”
Beroe Ginting enggo iëtehna si Adjar Taki, beroe Karo la iëtehna.
E maka koedas m’ia doeana. Djoempa, lawes si Adjar Taki, oeisna pë pertja-pertja. Beroe Karo lebë djoempa, beroe Ginting tading arah poedi.
“Koega pa maka kam lawes, mama! kam koedahi,” nina beroe Karo ngata si Adjar Taki.
“Oh, adjangkoe enda la nai ergoelamit, o bibi-ng-koe, tah aroesna erbibi, tah aroesna akoe ertoerang; akoe, pengindokoe la mehoeli,” nina si Adjar Taki djanah tangis.
Ia, roeis pë Iang, erboelang pë lang. “Oh, djelma koega pa nge kal ng’ënda ‘ndia,” atë beroe Karo, mekoeah atëna ngidah si Adjar Taki.
“Apai mergandoe, mama? maka kita ertoetoer,” nina beroe Karo.
“Ola kita ertoetoer, o bibi-ng-koe, terperikoet kam denggo ibas pengidokoe la mehoeli, terperikoet kam denggo ibas oeiskoe enggo merigat; idja kai kin dahinndoe, ëlah dahi, adjangkoe enda si la terdëdah,” nina si Adjar Taki.
Sapih beloeh ia ngerana, si Adjar Taki pë pantas, beroe Karo pë pantas.
“Oh,” atë beroe Ginting, ia ‘ndengkeh-‘ndengkeh arah poedi. “O, ‘ndo koesampat tjakap këna, teman, ras kaka, Perangin-angin mergana,” nina beroe Ginting, ningen tangis beroe Ginting, berëken boelang-boelangna ras kampilna.
“Ras kal kita, o toerang,” nina beroe Ginting ngata si Adjar Taki, iberëkenna boelangna, iberëkenna kampilna.
“Enggo, ënda me impal këna,” nina beroe Ginting ngata toerang beroe Karo. “Ras këna koe roemah Bintang Meriah. Iboenoeh bapa ngoedana i Koeta Boeloeh nari ëna, maka lompat ia ‘ndoebë. Enda me koeberëken oeisna,” nina beroe Ginting. “Moelih me akoe koe Koeta Boeloeh, këna koe roemah Bintang Meriah.”
Enggo moelih beroe Ginting koe Koeta Boeloeh, si Adjar, Taki doea-doea tading ibas oeroek Goeng Daholi.
Ben me matawari: “koe roemah kita impal,” nina toerang beroe Karo ngata si Adjar Taki.
“Kamlah koe roemah,” nina.
“Oh, la kari kita ras, akoe pë la koe roemah; ras këna koe roemah, nina ndadë bëroe Ginting siberoe ‘Ndëdah Lagoena; djadi la kam nggït, akoe pë la ‘nggït.”
“Oh, daram-daram kari mama sibajak Bintang Meriah,” atë si Adjar Taki. E maka: “enta, kam koetaroehken koe roemah.”
E maka ia koe roemah doea, arah tapin Bintang Meriah.
Djadi: “idja nari këna ‘ndadë, teman,” nina singoeda-ngoeda i laoe karina, ibentasi si Adjar Taki ras siberoe Reben, “meparas-metoenggoeng kal perdalin këna doea-doea, isë kal ng’ ëna, teman këna?”
“Ah, anak bibii Koeta Boeloeh nari,” nina beroe Reben ngata singoeda-ngoeda karina i tapïn.
Sêh i roemah: “idja pa nari këna,” nina si ngoeda-ngoeda i lesoeng, ban ‘nterem kalak noetoe i lesoeng, mentas si Adjar Taki ras Beroe Karo; meparas-metoenggoeng ia erdalin doea, sapih mehoeli roepana si Adjar Taki, mehoeli roepana beroe Karo, anak sibajak Lingga. E maka meparas-metoenggoeng, gelang sada tariken, timah sada penoeangen’ ndoebë ras si Adjar Taki.
E, bên me oeari, beroe Karo koe roemah, si Adjar Taki tading iteroeh; idja ingan mesoeni koedjë ia. Lït nge djamboer man nangkihen i Bintang Meriah, la ia koedjë. Lït djelma sekalak koendoel-koendoel iteroeh sapo pengada-ngadan, koedjë si Adjar Taki. Dapetna ertoetoer ia ras djelma sekalak, ersilih toetoerna.
“Koedja pa kal ng’ënda ngelegi pola, inemen sibajak Bintang Meriah ënda, o silihkoe?” nina si Adjar Taki ngata djelma sekalak ‘ndai.
Itoedoehkenna. Ilegi kitang, perpinemen koe roemah sibajak Bintang Meriah, pengelegïn pola. Itoedoehken djelma sekalak ras pengelegïn gagaten koeda sibajak Bintang Meriah.
Lawes si Adjar Taki ngelegi pola ras baba gagaten, tapi la iëteh mamana sibajak Bintang Meriah si Adjar Taki.
E, gelap oeari: “isë ‘ndai ngelegi pola ënda?” nina sibajak Bintang Meriah.
“Oh, la koetandaï, ipindona ‘ndai kitang sibajak; temoeëndoe ngë koeakap.”
“La lit temoeëkoe erkata ‘ndakan, amboerken pola!”
Koeda pë la ‘nggagat, sabap iëtehna si Adjar Taki ngelegi gagaten; radja la patoet ngelegi gagatenkoe, atë koeda. E maka la ia pêt ‘nggagat.
E man me sibajak Bintang Meriah, la nai inem pola.
Enggo ‘mbagas berngi lalap si Adjar Taki iteroeh, la idilo mamana.
“Oh lalap akoe kari la man ënda; benë kari koeda mama sibajak Bintang Meriah ënda, isë la ‘rsilangen rebi nai?” atëna si Adjar Taki.
E maka idahina koe toerë, toerë mamana. Lit singoeda-ngoeda ‘mbajoe, lima kalak i toerë.
“O, bibi, si ni toerë ënda, kataken si beroe Reben koe toerë,” nina si Adjar Taki iteroeh nari.
“Ma ia djënda, mama; i roemah andjoeng-andjoeng’ndai ia.” Itoedoehkenna koe roemah andjoeng-andjoeng.
Koedjë ka si Adjar Taki. E, maka djoempa ia ras beroe Karo. “Enta, amak man pedemen, o toerang beroe Karo,” nina si Adjar Taki.
“Lalap kam ‘ndai la man, kaka?” nina beroe Karo.
“La man pë, labo koega pa, lah lit amak man pedemen.”
“Maka kam la koedilo, la lit ‘ndai beras man dakanen; koenehen pagë man toetoên, ë pë la lit. E maka ‘ndai akoe lawes koe roemah andjoeng-andjoeng, ersingkih pagë, ë pë la lït kenan,” nina beroe Karo.
“E maka ola atë tjëda ‘ndahi koeta permaman, lalitman sekali denga kal.”
“Lang, bo atëkoe tjëda,” nina si Adjar Taki. E maka idoedoerkenna amak. Lawes koe djamboer medem ia.
Terang kang oeari minter rêh kang bapa ngoedana i Koeta Boeloeh nari, sipoeloe doea kalak sidalanen, erbedil ia kerina, erpiso gedang, moenoeh si Adjar Taki atëna maka ia rêh.
“Lït si Adjar Taki ‘ndai djëna, i djamboer?” nina bapa ngoedana.
“Lït, sibajak!” ningkalak idjamboer nari.
“Kataken ia soesoer,” nina bapa ngoedana.
La nai pang si Adjar Taki soesoer, idahna bapa ngoedana enggo ersindjata, piso gedang, bedil, “sahoen akoe denggo matë iboenoehna.”
“To, legi sitik temankoe, toerang beroe Karo koe roemah, bekasna ia ‘rbaba akoe rebi ia koe roemah ënda.” E maka lawes kalak ngelegi toerang beroe Karo.
Kiam beroe Karo koeteroeh. “Ola si-boenoeh-boenoeh,” nina. “La bantji djelma si rawa-rawa i taneh Bintang Meriah enda,” nina toerang beroe Karo.
Masin katana perban anak sibajak Lingga. E maka la pang bapa ngoeda si Adjar Taki moenoehsa. E maka soesoer m’ia.
“Kai kïn salah si Adjar Taki,” nina toerang beroe Karo, “nitjakapken.”
“Itjakapken,” nina sibajak Koeta Boeloeh.
“Kataken soesoer sibajak Bintang Meriah.”
Soesoer sibajak Bintang Meriah erdjoempaken sibajak Koeta Boeloeh, bapa ngoeda si Adjar Taki.
“Kai salah si Adjar Taki maka iboenoeh?” nina mamana.
“Kai pë la salahkoe,” nina si Adjar Taki ngata mamana. “Enggo, mama pë la ‘nggït minem pola koelegi, koeda mama pë la ‘nggït ‘nggagat sabap koelegi,” nina si Adjar Taki iher tangis ‘ntjakapkentja koe mamana. Salah la lït.
“Ola kam tangis, Adjar Taki, sabap pola la koeinem; langnga kam koeëteh. Di koeëteh, koedilo kam man. E la kap koedilo, ola kam megeloet la man gia, sabap la koeëteh; kam la ‘rkata ba-ng-koe,” nina mamana.
“Moelih kam gelah, sibajak Koeta Boeloeh, bapa ngoeda si Adjar Taki,” nina sibajak Bintang Meriah. “La bantji iboenoeh si Adjar Taki la ‘rsalah.”
E maka moelih sibajak Koeta Boeloeh, tading si Adjar Taki ras mamana sibajak Bintang Meriah.
Sêh seboelan, sêh setahoen ia i Bintang Meriah, erdalan ia doea-doea ras beroe Karo koe koeta, koe koeta kalak, la ilarang mamana, sabap impalna. Moelih lako goeroe beroe Karo, naroeh si Adjar Taki, erdalin doea-doea, la ilarang mamana.
“Ola ipetoemboek,” nina kang bapa ngoeda si Adjar Taki; “ipetoemboek, la lit emas peroendjoek, isirang lit emas pendaboeh sepoeloe doea tahil o silih,” nina bapa ngoedana, tenahna arah kalak.
Erdjoedi si Adjar Taki, roesoer taloe, meratoes, meriboe, tombang atëna Bintang Meriah. Nangkoi si beroe Reben gelang sibajak Bintang Meriah pertembë oetang si Adjar Taki. Oh, sabap ia la ipandang doea-doea ia erdalin, “akoe pë djoediken”.
“Oh, iboenoeh me gelah,” nina mamana sibajak Bintang Meriah, gila atëna, sabap djoedi la terngadikentja si Adjar Taki. Em salahna koe mamana.
“Boenoeh silih!” nina ngata sibajak Koeta Boeloeh, itenahkenna soeratna koe Koeta Boeloeh.
lëteh beroe Karo ia iboenoeh. “Oh, lawes kam gelah kaka, ‘nggo me ‘ndai sabap la naï terkawali akoe salahna, sabap kam erdjoedi, tombang Bintang Meriah ënda. Sada berngi nari kam koetahan, idarat kam medem, koeëmbahken pagi nakanndoe, oeisndoe ibas oeroek-oeroek Goeng Daholi.”
Lawes si Adjar Taki gelap-gelap ‘ndarat koe oeroek-oeroek Goeng Daholi. Toerang beroe Karo pë lampas erdakan, langnga terang pë oeari enggo erdakan.
Iboeatna soempit ras beras bekal si Adjar Taki. Langnga keri terangna enggo ia erdalin ‘ndarat ‘ndahi si Adjar Taki koebas oeroek oeroek Goeng Daholi.
Djoempa ia ras si Adjar Taki: “lampas kam gelah man, lah kam lampas lawes, adah më bapa ertenah koe Koeta Boeloeh, moenoeh kam,” nina beroe Karo.
E maka lampas ia man. Enggo, lit rimo sengkiboel, ibelah doea, ” ‘ndi, pan!” nina beroe Karo, “maka ‘nteboe pendapetenndoe pagi i koeta kalak.”
“Endam koesoeanken boeah rimo o toerang! Di ‘nggeloeh pagi rimo ënda,’nggeloeh nge si Adjar Taki atëndoe,” nina si Adjar Taki. Isoeankenna rimo man pertilikenna.
Enggo, “ënda tinaroeh,” nina ka beroe Karo, bereken tinaroeh matah sengkiboel. “Lït pagi manoek kalak medemken, tama ia idjë. Djadi naper pagi ia, ataoe saboegan pagi anakna, dilaki, ataoe beroe-beroe pagi anakna, diberoe me kepë anakkoe so pë toeboeh koetadingken nindoe o toerang Adjar Taki,” ëm tenahna.
E sêh setahoen, doea tahoen ataoe enem tahoen si Adjar Taki i djahë, kahë koe taneh Alas, tengkoe kedjoeroen Batoe-mboelan, teroes koe taneh Deli perdalinna.
Ban mehoeli roepa sibajak Koeta Boeloeh ikoeroeng ibas bilik tengkoe soeltan Deli si Adjar Taki, ikatakenna man rajetna karina: “isë ngidah roepa radja Karo mehoeli,” nina tengkoe soeltan Deli, “merëken sada serpi maka bantji.”
Seratoes kalak ngidah, seratoes serpi. Sabap roepa mehoeli ë maka enggo bajak si Adjar Taki.
“Nangkeng kam gelah,” nina tengkoe soeltan Deli, “enda belandjandoe enggo dat, oepah ngidah kam rajetkoe merëken sada serpi, ëm belandjandoe sibajak, ëm penolongkoe,” nina tengkoe.
“La akoe pang, o tengkoe; di la kin i atoer bedil, simbisa naroehken akoe, la akoe pang.”
“Seratoes simbisa tengkoe Laboehen, seratoes bedilna, seratoes boelajatna. Edim penolongkoe.”
E maka teroes ia moelihken i taneh Deli teroes koe Alas, tengkoe kedjoeroên Batoe-mboelan.
“Atoer simbisa si naroehken sibajak Koeta Boeloeh,” nina tengkoe soeltan Deli, itengesken soerat arah si Adjar Taki.
E maka niogë soerat tengkoe kedjoeroên Batoe-mboelan soerat tengkoe Deli. Enggo iogëna soerat maka iatoer tengkoe këdjoeroên siwah poeloeh, djadi seratoes siwah poeloeh simbisa man si naroeh sibajak Koeta Boeloeh, bedil pë seratoes siwah poeloeh, tong pë seratoes siwah poeloeh, kopi siratoes siwah poeloeh, timah siratoes siwah poeloeh serta ningen piso.
Ngadjarken tengkoe kedjoeroên Batoe-mboelan man simbisa siwah poeloeh: “Bengket pagi taroehken sibajak Koeta Boeloeh koe koetana. La pagi bengket, ola ko kahë,” nina ngata simbisa seratoes siwah poeloh.
“Boedjoer, tengkoe” nina.
E maka: “lawes me kam sibajak, ëndam si naroehndoe siratoes siwah poeloeh; em penolongkoe ras tengkoe soeltan Deli.”
E me kap nangkeng sibajak Koeta Boeloeh. ‘Ndeher siboelan tengah dalan iperangna ka lebë Boeah Oeroek.
Enggo sêh m’ia i goegoeng maka lawes nandangi poelo Bintang Meriah. Lampas ia tampë i kendit. Enggo sêh ibas lajo si Gerboeng.
“Ridi kam lebë, kerina kam simbisa-ng-koe,” nina sibajak. Ridi simbisa karina. Lawes sibajak, sisa-sisa, itadingkenna simbisa ridi ibas lajo si Nggerboeng. Lawes ia nangkih oeroek Goeng Daholi.
“Koega pa ‘ndia rimo koesoean ‘ndoebë, ‘ndo, koedahi,” atëna, sibajak. E maka sisa ia ‘rdalan. Idahna rimo enggo ‘mbelin, enggo me erboeah. Inangkihina, iboeatna.
Idjë, “o amë, to, ko legi bengkoeang“, nina beroe Karo, anak sibajak Lingga, tergelar siberoe Reben ngata anakna siberoe ‘Ndigan Malem gelarna, anak si Adjar Taki ‘ndoebë.
E sêh ia nidarat, inehenna koe oeroek-oeroek Goeng Daholi lit djelma idas rimo. “Oh, ndo, koedahi, roetang moeat rimo bekas bapa-ng-koe noean nina nandë, tah isë si nangkihsa,” atëna.
Isinggahina diberoe, diberoe ‘mbaloe-‘mbaloe man temanna atëna. “Mari bibi, temani akoe; adah kalak moeat rimokoe,” nina ngata diberoe ‘mbaloe-‘mbaloe, nandë si Bagi Litna, si lima kali redjai, pitoe kali ‘mbaloe; ibabana pisona, sekin si la ‘rsoekoel, djanah penggel, pengkali-kali gadoeng.
“Aloe ë kari koetakil,” nina ngata siberoe ‘Ndigan Malem, anak sibajak Koeta Boeloeh.
E sêh m’ia ibas batang rimo: “Ngkai maka iboeat kam mama, rimokoe ëna, roetang kam; isë pë la pang moeatsa,” nina ngata sibajak Koeta Boeloeh.
“Koeidah ‘ndai ‘mboeë boeahna tasak, ë maka koeboeat o bibingkoe; di roetang pë akoe la metangkang, teriket pë akoe la metangkang,” nina sibajak Koeta Boeloeh.
“Soesoerken, la nai ko lolo,” nina diberoe ‘mbaloe-‘mbaloe, nandë si Bagi Litna.
“E, koega pa pë, la nai akoe metangkang bibi, gelah ola kam merawa,” nina sibajak Koeta Boeloeh.
“Soesoerken me gelah, mama-ng-koe,” nina siberoe ‘Ndigan Malem, “bekas bapa kal kap noean rimo ënda.”
Tangis sibajak Koeta Boeloeh, “anakkoe kepëken enda, la nai akoe itandaïna.” ‘Ndaboeh koeteroeh iloehna.
“La oedan, lang, laoe kai ng’ënda mama-ng-koe, enggo bentjah takalkoe.”
“Sarintangtang rimo ënda,” nina si Adjar Taki.
E, roekoer beroe Karo i roemah: “sibar me anakkoe rêh ngelegi bengkoeang,” idapetina i roemah nari, idahna, lit djelma ibas oeroek-oeroek Goeng Daholi, sada idas rimo, doea iteroeh.
“Oh, enggo ‘mbera tampë si Adjar Taki, beritana enggo i tengah dalin, iperangna Boeah Oeroek, ningkalak ë. ‘Ndai ia sêh i goegoeng, minter inangkihna rimo, idapetina anakkoe ënda ‘ndai la itandaina bapana. Ah, ndo, akoe moelihken koe roemah,” atëna.
Moelihken koe roemah itanggerkenna nakan; ‘nggo tasak, iboeatna tinaroeh man bengkaoena, iboeatna pola tarë kitang si radjawali sampak soeasa, perpinenem sibajak Bintang Meriah. Em ibabana.
Enggo lawes ia koe laoe erpangir, maka mehoeli akoe kari idah si Adjar Taki. Moelihken ka koe roemah itjoerakna aloe minak, keri sada katja. Iboeat oeis mehoeli, rosë m’ia.
Enggo rosë, idjoedjoengna nakan, kadang pola tarë kitang, erdalin ‘m ia ‘ndarat bagi djoeroeng nandangi aras, toerang beroe Karo anak sibajak Lingga.
“Adah me kap rêh mama! nandë i roemah nari,” nina siberoe ‘Ndigan Malem.
“Adah më toehoe bibi beroe Karo, tergelar siberoe Reben, boedjang Bintang Meriah.”
“Oh, kam pë megombang mama! maka igelari kam nandëkoe. Idja ngë iëteh kam gelar nandëkoe e,” nina siberoe ‘Ndigan Malem.
E enggo sêh beroe Karo iteroeh rimo. “Koesampat sitik tjakapndoe amë,” nina ngata anakna, siberoe’Ndigan Malem. “Em la mehoeli pengindo bapandoe, pengidokoe. Ertoetoer me kam ëna bapandoe,” nina.
Minter siberoe ‘Ndigan Malem enggoerapas bagi binoeroeng kena toeba. “La kalak mëla amë, ertoetoer ras bapana, gendoari gelah akoe matë,” nina siberoe ‘Ndigan Malem, itemtemina bana.
Soesoer si Adjar Taki idas rimo nari. “Ola kam tangis, ame! E me kap akoe ‘ndoebë, di pertaloe erdjoedi maka koesoean rimo man pertiliken. E pë, di la kam ngadi tangis, moelihken ka akoe kahe.” E maka ia sip, siberoe ‘Ndigan Malem.
Enggo, “endi,” nina sibajak Koeta Boeloeh, loeahna oeis mehoeli, padang roesak santan boelêmbak. Enggo, “ola akoe mabasa koe roemah, belo lah ba-ng-koe, ‘mbako ras gambir, oeis mela akoe mabasa koe roemah, loeah bapa, medjenggi kal nina denggo kalak.” E maka gambir.
E maka lawes si beroe ‘Ndigan Malem; toea-toea mintas kiam, nande si Bagi Litna, igoelangna bana, tiwenna pe medelak.
“Ola kam tangis bibi,” nina siberoe ‘Ndigan Malem ningen ia pesipsa, isemboerina aloe belo ‘ndai.
“Bantji la m’akoe tangis ame, di kata-ng-koe enggo meter man sibajak Koeta Boeloeh, tah megeloet ia me denggo.”
“Lang bibi! la kap itandai; di sitandai, labo kita adön. Bapa pe iëtehna nge, labo ia lenge.” E maka itadingkenna me diberoe ‘mbaloe-‘mbaloe tertangis-tangis.
Sêh i roemah siberoe ‘Ndigan Malem, man ninina sibajak Bintang Meriah iberëkenna belo ras timbako, gambir: “bapa, nini! enggo rêh i djahe nari; ënda ‘ndai loeahna.”
“Ngena kal më amë lah enggo bapandoe rêh; enta, koealo-alo.” “Peloemë roemah sada, ingan djawi simbisa sibajak Koeta Boeloeh siratoes siwah poeloeh.”
Lawes sibajak Bintang Meriah ‘ndarat ningen babana gendang, siberoe ‘Ndigan Malem ersiap i roemah, ngatoerken koeran beras, ngatoerken latjina. Ola kari taloe beras atëna ban pantasenna.
E maka enggo më dêm pintoe-pintoe Bintang Meriah, iteroeh djoehar singgoepgoep, pintoe Bintang Meriah.
“Lawes me kita gelah koe roemah radja-ng-koe,” nina diberoe Karo ngata si Adjar Taki; “adah me kap enggo dêm pintoe-pintoe kalak ngala-ngalo kam.”
E maka lawes sibajak koe roemah, idiloken me simbisa seratoes siwah poeloeh, poeloeng me kerina tampë-tampë lajo si Nggerboeng.
Enda ipeloeas me bedil sibajak idjenda nari, tenah ‘ndoebë tengkoe kedjoeroên Batoe-mboelan ras tengkoe Deli. E maka meriah me sora bedil. Ngajak si ‘rdemoe oerat djaba teman si baleng ningen sibajak Koeala, sibajak Perbesi, ningen pengoeloe Batoe Karang.
“Bedil kai meriah, la kap beritana moesoeh?”
“Sibajak Koeta Boeloeh enggo tampë,” nina kalak erberita si enggo meteh.
“Ia, idahi.”
Rêh me kalak’ndahisa i barat, i timoer nari, kendjahë, kendjoeloe, djoempa i Bintang Meriah me kerina. Sêh asa gelap djelma rêh. Terang ka oeari la ‘rngadi-ngadi kalak rêh. Kerbo pë matë ras lemboe man bengkaoe simbisa siratoes siwah poeloeh.
Pitoe berngi dekahna ia poeloeng i Bintang Meriah ras gendang ras bedil la ngadi-ngadi. Kerbo ras lemboe pagi rebi matë, manoek ma iëteh beliganna sabap boeëna.
Sêh pitoe berngi: “O, sibajak! ‘mboeë kam keri, roegi man bengkaoe, man nakan kami. Di langnga kam bengket koe Koeta Boeloeh, la kami bantji lawes moelih,” ninam simbisa ngasak sibajak Koeta Boeloeh.
“Pagi më kita erperang koe Koeta Boeloeh,” nina sibajak Bintang Meriah.
E maka erderoep me sora bedil; sibajak Koeta Boeloeh pë enggo ergëntas koeboên nimaï sibajak Koeta Boeloeh enggo ergëntas. E, lebë simbisa sibajak Koeta Boeloeh si la pan piso, si la pan timah, bekas ngë simbisa tengkoe kedjoeroên. Minter kiam ia ngajaki Koeta Boeloeh, siratoes siwah poeloeh.
Taloe Koeta Boeloeh la iëteh beliganna djelma matë nitjampoengnang simbisa kedjoeroên. Minter itangkap sibajak Koeta Boeloeh bapa si Gantjih Radja, bapa ngoeda i Adjar Taki. Enggo igeleh simbisa si Adjar Taki ras’ ‘ndeharana.
“Kai sabap anakndoe ni perang kam, ipedarat kam la ‘rsalah ‘ndoebë, tjian atëndoe; ë maka kam nigeleh o, sibajak,” nina simbisa. Igeleh me ‘ndoebë bagë singgeleh manoek.
E maka enggo nembeh ginemgem karina Koeta Boeloeh. Enggo tandë sepoeloeh berngi, Koeta Boeloeh taloe, poeloeng radja-radja karina, i barat nari, barang sibajak Perbesi, sibajak Lingga, poeloeng i Koeta Boeloeh.
“Ola kam ‘mbiar, kam bapa karina, sabap bapan-ng-koe koeboenoeh, salahna pë ‘mbelin.”
“Labo kami ‘mbiar, sibajak Koeta Boeloeh; ibegi kami nge berita,” nina radja karina.
E maka enggo moelih simbisa, erloeah kerbo ras koeda, koeda ternonggal simbisa, kerbo ternonggal, ibahan sibajak Koeta Boeloeh.
“Koerang kerbo, sibajak, legi koe Lingga.” nina sibajak Lingga.
“Koerang kerbo legi koe Batoe Karang,” nina pengoeloe Batoe Karang ngata si Adjar Taki, man loeah simbisa kahë man tengkoe soeltan Deli, man tengkoe kedjoeroên. Empat boelat man tengkoe Kedjoeroên, koeda, kerbo pë empat, empat man tengkoe Deli, empat ka kerbona.
Em itenahken si Adjar Taki: “ola la sêh man tengkoe akoe enggo bengket ënda koe Koeta Boeloeh.”
Kahë me ‘ndoebë simbisa karina, “tading bedil i goegoeng seratoes siwah poeloeh ënda, man sekawal Koeta Boeloeh ënda, sibajak,” nina simbisa. Djadi seratoes siwah poeloeh koedana, seratoes siwah poeloeh kerbona kahë man loeahna.
E maka moelih sibajak Koeala, sibajak Perbesi ningen pengoeloe Batoe Karang.
Idjë maka enggo sinik atëna sibajak Koeta Boeloeh si Adjar Taki, iëmpoïna siberoe Reben.
Isë pë la nai lit radja dês kentja ningen boedjoer serta ras ‘ndeharana ningen melias ertjakap medatë, apai pe la ‘ndobah djelma koe roemah, soeboek radja, soeboek ginemgem, mehoeli nge katana, mehoeli pengkimbangkenna amak.
E maka si Adjar Taki pë bagë.
Sumber : Toeri-toerin Karo, nipepoeloeng Toean M. Joustra, 1914
