Uliling

by
ilustrasi
ilustrasi

Asum si Sapa langa mbelin, la itehna uliling. Ibas sada wari gawah-gawah ia ku kerangen, ersurak – surak : “Aiyo, Aiyo!”

Mintes begina sora ngaloi: “Iyo, iyo!“

Nembeh ia. “Isë?“ nina.

“Ise?“ ngaloi uliling.

“Kai atendue?“ nina.

“Atendu?“ ngaloi uliling ka.

E maka merawa Si Sapa ndai. “Anak ah, naling-naling atena aku,” nina.

Jenari ibelaskenna cakap si la mehuli pe. Tapi kai gia nina, bage pe iulihi uliling ndai cakap si la mehuli pe. Errawana ia, kiam ia ndarami anak ndai atena. Tapi la datsa.

Lawes ia ku rumah, dahina nandena, iherna tangis iturikenna si jadi ndai.

“Oh nande,” nina, “si la mehuli pe ibelaskenna man bangku.”

Tawa nandena, nina: “O tongat, sikali enda isalahi kam bandu, sabap uliling ndai la ersalah, katandu jine ibelaskenna saja. Bicara mehuli katandu ndai, tentu si mehuli ibelaskenna man bandu; tapi perban megombang katandu, e maka megombang pe kata uliling ndai.

“lnget, o tongat! ibas geluh enda pe bage. Langkah kalak ras pengeranana man banta, gelgel e bagi langkahta ras pengerananta ku kalak. Bagi uliling, iulihina langkah ras katanta. Di mehuli, si mehuli iulihina; di la mehuli, si la mehuli iulihina!“

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pemena)

Disusun oleh J.H.Neumann.

1915.