Gawah-gawah me kalak perjuma ras anakna ku kuta Anu. Sidang erdalin ia idahna ibas pasar sipatu kuda.
“To tongat, buat sipatu kuda adah,” nina bapana
“Man kai e,” nina anakna, “la lit nari lakonna“.
E, sinik bapana, tapi buatna besi ndai, ibabana.
La ndauh nari ia erdalin jumpa perpanden; idayaken bapana besi ndai, dat telu sen. Lit ije kede, e maka lawes bapana kuje nukur rambe telu sen, waluh ngkibul sada sen. Datsa dua puluh empat ngkibul. Kenca bage itamaken bapana rambe ndai ibas tempinna lawes ia.
Las mekelek, mokup iakap anakna ndai, muas pe, lau ma lit, mengga atena buah rambe ndai. Tak! La arap, naktak rambe singkibul, ibahan bapana. Mintes bengkung anakna, buatna rambe ndai, ipanna.
La ndauh, naktak ka rambe sada, mintes ibuat anakna ka. Bagenda ka ibahan bapana seh keri buah rambe kerina; sada-sada rusur ibahanna naktak.
Kenca keri kerina ngadi bapana erdalin, ikatakenna man anakna, nina,
“Bicara kam ndai la mekisat mbengkung sikali, muat besi sipatu kuda, la pada kam mbengkung dua puluh empat kali, muat buah rambe ndai kerina”.
Sumber :
Erbage-bage Toeri-toerin. Soerat Ogen Man Danak-danak Sikolah i Taneh Karo.
(Penggel si Pedoeakan)
Disusun oleh J.H.Neumann.
1915.