Si Kambal-kambal

by

La ndauh sirang ras kuta Anu lit me ije rumah kitik, rumah teratak nina. Dua depa sagi kenca belinna, tarumna bulung ketang, binangunna buruk pe. Si mada rumah e kalak musil-musil kap, anakna nterem, siwah ia simpangan.

Mesera mekelek akap bapa ras nande muat nakan, sabap kelegon taneh ndai, pagena kalak kerina lambang. E maka lawesen kalak kerina ku kerangan ersagu.

Bage pe Pa Kambal-kambal ndai, enggo piga-piga kali ia ku kerangan ersagu. Tapi enggo keri kerina batang pola itabah kalak e, maka ma nai nari itehna ija muat nakan man isi jabuna.

Ibas sada berngi, kenca enggo tunduh anakna kerina, ercakap-cakap bapa ndai ras ’ndeharana, bage nina:

“Tah ja pepagi sibuat nakan man anakta. Ola lebe beras tah jaung, sagu pe la lit. Aku la kuteh nari ija sibuat sitik nari man pangan”.

“Aku pe la kuteh nari ’rukur,” nina deharana. “Kai pe ma nai lit, mate nari kita,” tangis ia.

“Aku kuteh sada nari,” nina bapa. “Pepagi ku kerangan kita maba anakta kerina. Ije si pelepas guro-guro ia. Sidang ia guro-guro ije, lawes kita. Tah kai pagi anakta la siteh, tapi mbera jumpa kalak si erkuah ate ngenenca”.

Andiko! tangis nande mekelek, sembep-sembep, nina: “Si enda nari kin, jadilah. Lah ola kuidah mate ia lumben”. Jenari lawes ia medem.

Tapi lit kepeken sada ibas anakna, langa tunduh, ibegina cakap urang tuana. Ia si ntua, tapi perban gendekna, Si Kambal-kambal gelarna. Minter turah ukurna ndarami akal, gelah itehna dalinna mulih ku rumah.

E maka datsa ia sada, erpagi-pagi tekuak manuk enggo kuteruh ia ndarami batu rintik, dem oncang-oncangna ibuatna. Jenari lawes ia ku rumah.

Enggo sikap urang tuana lawes ku kerangan. Ingetina anakna kerina, “ota, ku kerangan kita!” nina.

E maka ras m’ia kerina ku kerangan, melehe gia, la lit kai pe man pangan. Sidang anak anak guro-guro ije, lawes nande-bapana, itadingkenna anakna.

Enggo ben wari maka gejap ibas anak-anak ndai maka nande-bapana ma nai je. E tangis m’ia, nderkoeh, “O nande! o nande!” Tapi ise pe la ngaloi.

E maka reh Si Kambal-kambal ndai, nina: “ola tangis, aku meteh dalin ku rumah. Ndai  naktak kuban batu rintik rusur, cuba si-ikut-ikut bekas enda, tentu jumpa dalin ku rumah”.

Bage ibahanna, tuhu datsa dalin ku rumah. Enggo gelap asum ia seh i rumah. Iteruh denga ibegina sora nandena tangis. E maka pedas ia ku rumah, gelah iteh nande, maka la bene kami, atena.

Oh! meriah akap nandena, ngenehen anakna ndai. Janah sabap enggo dat sagu sitik, man me ia ras kerina. Jenari lawes medem ia kerina.

Enggo telu berngi ia ka ras. Arih-arih urang tua anak-anak ndai, maka ibabana anakna ku kerangan ka, sabap nakan la nai lit. Mintes ibere nandena, sabap ngarap ia Si Kambal-kambal meteh dalin ku rumah ka.

Metinggel pe Si Kambal-kambal, ibegina cakap urang tuana. Pepagi kubuat ka batu rintik, atena.

Tapi pepagina kesiangen kerina, ma nai lit sempat ku lau muat batu. E maka ibuatna jaung sitik tamana kubas oncang-oncangna. Jenari sidang erdalin, rusur naktak singkibul jaung ibahanna.

“Arah e kueteh kari dalin ku rumah“, atena.

Kenca ndauh ka ibas kerangan tua, lawes urang tuana, itadingkenna anakna ije. Enggo ben wari maka terteh man anak ndai urang tuana enggo lawes. Tangis me kerina, nderkuh, sabap la idahna nari nandena.

“Ola kena tangis,” nina Si Kambal-kambal, kubabai kam kari ku rumah”.

Tapi andiko! Ia pe la nai meteh dalin, sabap enggo ipangani manuk-manuk jaung si nitamakenna kubas dalin. Enggo keri kerina. E, papak-papak ia kujah-kuje. Enggo gelap kal, melehe akapna, tangis-tangis pe.

Kenca enggo ndekah sitik bage lalar, idahna rempet bagi tendang. Minter idahina. Lit idahna rumah mbelin, palas batu galang, pintunna mbelang. Lawes Si Kambal-kambal kuje, nuktuk ibas pintun.

Reh diberu maba tendang. “Kai atendu, tongat?” nina nungkun.

E maka ituriken Si Kambal-kambal kai si jadi ndube nari.

“Andiko !” nina diberu ndai. “Enda kap rumah Si Balagais. Adi kari ia reh ku rumah, bene kam kerina. Sabap ipanna kam. Madin kam lawes !”

“Labo mbiar aku,” nina Si Kambal-kambal. “Bere min, maka kami erberngi ijenda”.

E maka iberena ku rumah. Nakan pe iberena. Jenari ibunikenna teruhen peratas, inganna medem.

La ndekah nari reh Si Balagais ku rumah. “Bo manusia kuanggeh?” nina.

“Lang,” nina ndeharana.

“Bo jukut babi ena, entahsa?”

“Lang,” nina.

“Bo manusia ningku?”

Jenari idaramina, datsa anak-anak ndai teruhen peratas. Minter isarenna alu nahena iteruh peratas nari, munuhsa atena.

Tapi reh ndeharana, nina: “si asuhilah lebe, kenca pagi mbur, banci ipan !”

E tuhu akap Si Balagais ndai. Itamana kubas karang babi, ikarangkenna. Jenari man ia. Kenca man lawes ia medem.

Terang kenca lawes ia kuteruh, ngenehen atena, kuga rupa jelma ibas karang babi. Tapi sengget ia, sabap la nai ije ia. Sabap enggo ipulka Si Kambal-kambal karangna ndai, lawes ia ras agina kerina. Enggo ndauh ia kerina.

Minter ibuat Si Balagais sipatuna, alu sipatu enda ngasup ia ningkahi kelbung. Lawes ia ngayaki anak-anak ndai. Nandangi ciger, idah Si Kambal-kambal maka reh Si Balagais. Minter cebuni ia ras agina ibas daling kayu mbelin. Si Balagais pe ngadi iteruh kayu ndai. Medem-medem ije, sabap enggo panasen ia.

Kenca enggo tertunduh, reh Si Kambal-kambal. Ibuatna sipatuna ndai, itamana nahena kubas, agina petamana kubas sipatu, sabap mbelin sipatu e. Jenari lawes ia, terna lawes bagi angin kaba-kaba.

La ndekah enggo seh ia i rumah urang tuana. E meriah akap urang tuana ngenehen anakna, tangis pe ia perban meriah ukurrna.

Tapi Si Kambal-kambal lawes ndahi Raja. Pindona jadi upas, sabap la lit teren erdalin asang ia, ibahan sipatuna ndai. E maka ialoken Raja ia, mbelin pe upahna iberekenna bana.

Anakna pe iempoina janah asa matena lalap ras Raja ndai ia. Urang tuana pe la kekurangen, sabap mbelin pe pemerena man bana ras man agina kerina.

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pedoeakan)

Disusun oleh J.H.Neumann.

1915.