Si Jinaka.

by

Ibas kutana, ikataken kalak si Jinaka, kalak perkisat. La enggo idah kalak ia sekali pe erdahin i jumana. Ndeharana pe la enggo erdahin. Tapi idah kalak rusur jumana terangkenca, enggo rusur mbelang bekas erdahin.

Sekali asum ia tedis itepi jumana, nungkun kalak sebalengkenca, nina, “Kuga nge dalanna maka enggo kuidah ena dung jumamu enda idahi? Erdahin la enggo ko kuidah ras ndeharammu ah?”

La ietehna berngi terang bulan ia erdahin.

“E nge katandu? Enda kap cuan keramat. La pe icametken, ncametken bana ia,” nina si Jinaka. Iangkatna cuanna, icidahkenna cuanna e. La ikatekenna berngi ia erdahin.

“O, ija datko e Jinaka?” nungkun ia.

“Iah, enda keramat merekenca,” nina si Jinaka.

Kenca bage, enggo mbar kal maka cuan si Jinaka ncametken bana. E maka melala kalak merhat nukursa. Ije lit sekalak bayak, reh ndahi ia, nina, “Endo kutukur cuanmu ena Jinaka.”

“Banci nge itukur kam. Kubere nge. Saja ergana meherga kal, lebih asa erga jelma sada,” nina si Jinaka.

“Erga jelma sada 48 serpi ngenca. Kudayaken man bam 100 serpi,” nina si Jinaka.

“Tapi ola kari terpantang,” nina ka si Jinaka.

“Kai pantangenna?” nina kalak bayak e.

“Pantangenna labo mesera, ola icinepi laneng saja,” nina si Jinaka.

“Oh, adi e nge, la kap mesera, endo cuanmu ena,” nina kalak bayak e.

Jenari nina ka, “Enah 100 serpi, ting-tingi entah lit kari la mehuli ?”

Ialoken si Jinaka me 100 serpi, iting-tingina, kerina mejile sorana. E maka iberekenna cuanna si beluh erdahin la icametken e.

Berngina itamaken kalak bayak enda me cuan si Jinaka e i tengah jumana. Papagina inenna jumana, labo lit bekas erdahin. Minter idahina si Jinaka.

“Enggo itokohiko aku Jinaka. Labo nggit erdahin cuanmu enda ndai. Endo serpingku rebi, adi lang kuaduken man Raja,” nina kalak bayak e.

“Enggo me icinepi laneng iban kam. E la nai bo lit gunana cuan ena ndai. Adukendu pe man raja talu nge kam,” nina si Jinaka.

“Ota dage si dahi Raja,” nina kalak bayak e.

“Ota,” nina si Jinaka.

Reh nina Raja, “Kai kin perjengilendu duana ?”

“Nina si Jinaka enda, maka cuanna enda banci ncamet bana, kutukur 100 serpi, Raja. Je nderbi nai kutamaken i juma. Ndai erpagi-pagi kunen bekasna kai pe la lit. E maka kupindo serpingku rebi mulih la iberena Raja,” nina kalak bayak e.

“Payo bage Jinaka ?” nungkun Raja.

“Si tuhuna, cuanku ena, cuan keramat Raja. Perban ncametken bana ia rusur, merhat kalak nukursa. Ieteh kam gia Raja, ma labo aku gelgel erdahin? Ndeharangku pe la enggo erdahin. Si tuhuna mberat kal nge kuakap nderbi ndayakenca. Tapi iajar-ajarina kal aku maka kubere. Nderbi kukataken man bana, maka cuan enda la banci icinepi laneng. Enda kuga pe rebi enggo icinepi laneng. Ija nari nge nggit aku nggalari duit kalak bayak ena ndai,” nina si Jinaka man Raja

“Payo bage nina ?” nina Raja man kalak bayak.

“Payo Raja,” nina kalak bayak.

“Adi payo bage la esah adundu, sabap kuga pe enggo me icinepi laneng cuan e. E maka mulih kam duana.”

Mulih kalak bayak e ndele kal atena, bene duitna 100 serpi.

Sekali iakuken si Jinaka juma kalak. Nina maka juma e, jumanna. Reh nina si mada juma, maka jumana juma e.

“Adi bage kin si dahi Raja, entah apai kita kari si bujur,” nina perjuma.

“Banci ota,” nina si Jinaka. Lawes kalak enda ndahi Raja.

Reh nina raja, “Enda enggo ben wari, e maka papagi kenca ciger kuje kita gelah si eteh, entah apai kam si bujur.”

“Merandal Raja,” nina duana.

Berngina nandangi terang, isuruh si Jinaka nandena nangkih pola si lit sada i tengah-tengah juma e.

Papagina kenca ciger, berkat ma Raja ras dua kalak juak-juakna, iarakken si perjuma ras si Jinaka. Seh ia juma persirawaten e.

“Enda jumangku si jumangku nina si Jinaka e, Raja,” nina perjuma.

“Jumangku nge enda, tapi jumana nina, Raja,” nina si Jinaka.

“Tandana jumandu e, kai ?” nina Raja man perjuma.

“Pola bekasku nuan, si nitengah juma enda. Enggo ndekah juma enda ibuat kami. Batang nangka e, bekasku nuan, pang aku erduhum adi la juma enda jumangku,” nina perjuma.

“E la tuhu Raja. Aku pang aku isungkun Dibata, adi la kari jumangku, juma enda,” nina si Jinaka.

“Kuga ningen nungkunsa ?” nina Raja.

“Aku beluh nungkunsa,” nina si Jinaka.

“Sungkun dage,” nina raja.

“Banci,” nina si Jinaka.

Megang, ibahanna pengelbuhna, “O Dibata, ma si Jinaka empuna juma enda ?”

La lit sora ngaloi, iulihina ka. La lit ngaloi. Petelu kaliken ilebuhna megang kal, “O Dibata, ma si Jinaka empuna juma enda ?”

“Ue !” nina megang sorai datas pola nari.

“Tabah pola e,” nina Raja.

“E ola, idas nande,” nina si Jinaka.

“Adi la iberendu itabah, nggalar kam 100 serpi,” nina Raja.

“Nggalar pe labo dalih,” nina si Jinaka.

Iputusken Raja, maka juma mulih man perjuma. Janah si Jinaka nggalar 100 serpi, sabap ikatakenna juma kalak jadi jumana.

Sumber :

Seri Turi-turin Karo Beru Dayang Jile-jile.

Disusun oleh Masri Singarimbun & Ngukumi Barus.

(1989)