Pande ras Perpola

by
pandai besi

Maka lit me sakalak malbal polana, ndeher ku dalin pande besi. Maka sangana malbal gelgel perpola ndai, mentas pande, bagem nina: “lit me utangndu lima puluh kurang dua e!”

“Langa!“ nina perpola. Maka gelgel me bage nina pande, sangana ia mentaskenca.

Maka enggo kenca erlau pola ndai, sangana kenca ngeria perpola ndai, mentas ka me pande telu kalak. Jenari idilokenna ka, “lit me utangndu lima puluh kurang dua e!“

“Lit me,” nina perpola.

Jenari minter idahi pande perpola ndai, ras temanna, ibabana pasa. Jenari nina pande ndai, “galar dagena sendah. Adi la kam nggit nggalar, teriket me sendah! Ndekah me kutunggu, sikali enda denga ngenca lit nindu,” nina.

Tapi iakap perpola ndai maka bagenda nina pande, “lit me lau polandu e!”

Jadi sabap lit gelgel teman pande ndai megisa la nai tampil lang, nggalar perpola ndai 48 serpi.

Maka kenca enggo nggalar ia, mesui kal atena, sabap labo tuhu lit min utangna. Ibas sada wari idahi perpola pande ndai, nina, “o pande, nepa cincin kam min sitik besi perpulungen, man bangku”.

“Banci,” nina pande.

Maka pepagina, ibabana me ku perpanden. Seh i perpanden itama pande me kubas api, perpola ndai me ngembus. Sangana ia ngembus, ibahanna me turiturin, pande ngue-nguesa. Nina bagenda:

“Em akap kam ka pande, kucuba me mentuk kawil, kitik-kitik kal gelang-gelang ndai, asa pasi-pasi sekin gugung. Janah kudarami, kitik-kitik tamas-tamas buluh belin, asa paha. Maka sangana kutabah buluh ndai, ipantemna pedi, irewasna ka kuliki idatas. Tambah tindih gule pangan ateku ka pande. Jenari kucuba me ngkawil, minter ipanna, kutandeken pemoran ibas batang buah, buah ndai pe ibentukkenna, mbungkar ka pande! Tama-tama dekahna dat ka pande, kitik-kitik kal. Takalna enggo seh i rumah kupersan, ikurna i lau denga ka pande.

Kenca seh i rumah kulapahi lah ateku ka pande, e maka kugarut lebe sekin. Sangana ergarut, sira! sira! nina sorana aku ergarut ndai ka pande! Jenari kuongkam teruh garut enda, sira kerina ka pande! Enda tambah tindih gule-pangan ateku ka pande! Jenari kubuat cingkamna ateku ka pande! Jenari kukiskis rembang ku bitis gajah ka pande! Minter aku ipaditkenna ku tengah awang-awang, payokenca natap nateku ka pande! Kenca bage ndabuh aku, sampe ka idatas rimo keling ka pande. Tambah tindih enda gule-pangan ateku ka pande! Kenca bage kuteruh aku, kubaba rimo ndai kuteruh deba ka pande!

Jenari lawes kahe ndayaken rimo enda ateku ka pande! Kenca bage kulanja ka pande. Sangana kulanja, engkik! engkik! nina sorana. Jenari kunehen teruh kikikku, bengkiklah kerina ka pande! Tambah tindih gule-pangan aku ka pande. Bagem turiturinna. Cuba nehen besi ndai pande !“ nina perpola.

Jenari inehen pande, enggo melebur besi ndai, tarunna tawa-tawa megi turiturinna ndai.

E maka sabap enggo melengas besi ndai, rutang ka pande ndai 48 serpi.

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pedoeakan)

Disusun oleh J.H.Neumann.

1915.

Turi-turin Karo “Pande ras Perpola”.
Penutur cerita : Emelia Syahputri beru Barus (Patumbak).
Sumber : Tralikatara.
Turi-turin Karo “Pande ras Perpola”.
Penutur cerita : Alda Agata beru Sembiring Pelawi (Seberaya).
Sumber : Tralikatara