Pa Rulih

by

Pa Rulih kalak bayak me kap. Rumahna mejile, kudana dua, kerbona telupuluh, babina ras manukna melala, sabahna mbelang janah serpina la terbeligai ningkalak. Sekali iturikenna man kami dalinna maka mbayak ia, bage nina:

Asum aku anak-perana denga madiateku erdahin, gawah-gawah saja ateku. Tah kai isuruh kalak aku la kudahi, sabap senang kuakap kundul-kundul ibas jambur tah main satur ras teman. Tuhu bagidie mela kuakap nginget langkahku si nai. Maka sabap kisatku ncari, duit pe la asakai ibas aku, mindo man nande tah bapa aku pe la pang, sabap musil-musil ia. Asum ka sekali picet utangku, kudahi mamangku, ngeraih ateku. Nupung e mama i juma, ngada-ngada teruh sapona,

“Kai atendu,” nina.

“Ngeraih ateku, o mama,” ningku.

“Serpingku ma lit; tapi kuteh sada nari muatsa Tapi ola terteh da ! Begiken, julun jumangku itanemken ninindu serpina nai. Inganna la iteh payo, tapi emas tentu lit je. Cuba kuruk, tentu dat kam”. Bage nina mama.

Sabap mama gelgel e la perbual, tek aku katana. E maka berngi asum terang bulan kudahi kuje maba cangkul. Kucubaken ncangkul taneh julun juma mama, mesera mekelek, sabap la semal aku njemak cangkul. Tapi ku usur-usuri, ngarap aku dat emas nini. Kenca sada tah dua jam aku ncangkul, enggo mbelang bekas, panasen aku tapi langa datsa.

“Pala berngi pagi kudungi, latih kuakap,” ningku ibas ukurku. Jenari lawes aku ku jambur medem.

Berngi pagi kuje ka aku kudarami tole, la banci lang dat, nateku. Tapi kai pe la dat, enggo lebih telu puluh inganen kukuruk.

“Tah pagi kudahi mama ka, nungkun ia, tah arah apai akapna inganna,” ukurku.

Pepagina ku juma mama ka aku. Kenca idahna aku, cirem ia.

“Enggo cubaken kam ngkuruksa?” nina.

“Enggo,” ningku, “tapi kai pe langa dat”.

“Cuba begiken,” nina mama. “Emas lit ije, tapi langa dat kam. Endi, buat tualah enda ras bertah rimo enda, suan ibas lubang si nggo ikuruk kam, tentu pagi teridah emas nini.”

Lawes aku, nembeh ateku, mela kuakap. Tapi rukur ka aku arah pudi, “ah, tuhu kata mama ngajari aku atena. Pala kucubaken”.

Mulih aku ku juma mama ka, kupindo sinuan-sinuan ndai. Kusuan ibas ingan si enggo kukuruk. Turah pe, kupesai rusur.

E me kap mulana pekenku si mbelang enda. Rusur kupebelang, janah kenca enggo lit sitik, ergula aku, ka pe kubahan juma jaung, muat duit, maka erbinaga sitik. E maka enggo talu kisatku, sabap enggo kunanam-nanam riahen muit asang kundul-kundul tah medem-medem.

Asakai duit aku dat, kubuniken, la kutukur barang sia-sia i tiga, bagi kuidah gendowari langkah anak-perana. Dungna lit buatenku sitik. Tapi bena-benana e me kap si kuturiken man bandu ndai.

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pedoeakan)

Disusun oleh J.H.Neumann.

1915.