Ola Bage Perkahe Magar

by

Ibas sada kuta, lit sekalak anak perana gelarna Magar. la anak sada-sada. E maka megani kal ia. Perbahan idahna lit rusur kalak mbue erjuma dagang, idahna kalak reh kenca nangkeng si erjuma dagang e enggo mejile uisna, janah lit ka pe deba minter empo, sabap enggo lit duit man perunjuk, merhat ka ia ngkahe erjuma dagang.

E maka nina sekali man nandena ras bapana, “O nande, bage pe man bapa katangku, papagi ngkahe ateku erjuma dagang. Sabap melala kuidah kalak si erjuma dagang e, mulih enggo mejile uisna. Lit ka pe kuidah ibabana duit man perunjukna empo”.

Reh nina bapana, “Ola kam ngkahe anakku, adi i jenda labo enggo kam ku juma, entah labo tuhu kam denggo i jahe ah erjuma dagang, apai denga ka i jahe ah mokup kal, adi i jenda pe kam labo enggo erdahin. Muat suhsahna nge kap ngkahe. Adi kerna perempondu anakku, adi la pagi terbuat kami ras nandendu, banci nge ikukuken anak beru seninanta si nterem”.

“Mela aku perempongku kerina naring anak beru senina kena bapa. Kam ras nande pe la ateku kusuhsahi,” nina si Magar man bapana.

“Kuakap pe labo padah kam erjuma dagang anakku, labo pagi ikenai anak beru senina, banci nge kam ipempo kami,” nina nandena.

Tapi kai pe nina nandena ras bapana, megekgek kal si Magar maka ia lawes papagi erjuma dagang, ras sekalak temanna si mbaru reh. Nina temanna e, erjuma dagang ndai seh kal senangna, sekali ertulak lada, minter melala kal dat duit.

Erkiteken kuga pe berkat nge nina si Magar, e maka nina nandena, “Adi kuga pa pe la nai bo terlanglangi, berkat kam pagi anakku. Bekalndu i dalan, banci nge kupesikap”,

“Duit pe sitik ah, banci nge kubuat, gelah tutus pagi atendu erjuma dagang ndai,” nina bapana.

Papagina erpagi-pagi berkat me Magar ras temanna si enggo piga-piga tahun erjuma dagang. itadingkenna ndeharana ras anakna i gugung. Berkat Magar itaruhken nandena ras bapana seh lepus pulo-pulo kuta

I darat pulo-pulo kuta kundul me ia kerina. Ngadi. Ibereken nandena ras bapana pedan-pedah kerna kalak lajang, beluh erteman, beluh muat nande ras bapa, tutus ate erdahin, ola mekisat isuruh kalak.

Ije nari maka ibereken nandena me bekalna si nijujungna ndai i rumah nari. Bapana pe iberekenna sitik duit man belanjana kari i juma dagang. Man temanna si ras ia berkat ngkahe e, ipindo nandena ras bapana maka gelah si ajar-ajaren ia i juma dagang.

E maka berkat me Magar ras temanna, janah nandena ras bapana pe berkat me mulih ku kuta. Agakna enggo seh pitu uruk ilepusi kalak enda, ngadi ia duana, sabap engo latih iakap Magar.

Sangana ngadi e rukur Magar, je nina man temanna, “Engko me ngkahe, aku la sahun ngkahe, sabap ningkalak, maka i tengah deleng ah kari lit arimo, banci kita ipanna”.

“Ada kerna arimo anak, padanta nge ndube, adi kin biakta pangan arimo, i rumah pe kita bancing ipan arimo. Adi biakta kin la man pangan arimo, reh kita ku inganna ah pe lawes nge ia,” nina temanna e.

“Engkom ngkahe, aku mulih me ku rumah, la tertangkeli buena urat-urat ngkahe ningkalak,” nina Magar.

“Adi e kin erbahan engko la sahun ngkahe, i jenda ko,” nina temanna e. Berkat ia, itadingikenna Magar si sada ije.

Seh ben rukur-rukur Magar ije. Sabap si tuhuna mela kal nge ia la sahun ngkahe, sabap kerina teman-temanna anak perana enggo meteh maka ia ngkahe sekali enda.

Enggo erkata pet-pet maka ia mulih ku rumah. Janahna erdalan ukurkenna me jabapna, adi nungkun kari nandena ras bapana, ngkai maka la sahun ngkahe. Ije idahna rih la erteran, e maka nina ukurna, adi nungkun nande ras bapa entah teman-teman anak perana ras si nguda-nguda, maka nina dalanna maka ia la sahun ngkahe, erkiteken jumpa ia rih la erteran.

Iagakkenna elah kalak man kerina i rumah, berngi, maka ia pang ku rumah. Sengget kal nandena. Sabap iakapna anakna sangana itengah dalan ku juma dagang.

Kenca dung ia man, isungkun nandena ia, nina, “Ngkai maka kam la sahun ngkahe ndai, anakku ?”

“Ah nande, maka aku la sahun ngkahe, la kena kuakap warina.”

“Ngkai maka la kena warina nindu, anakku,” nina nandena.

“Perban jumpa ndai aku rih la erteran,” nina si Magar.

“Kak, kak, kak,” tawa bapana. “Ija idah kam ras ndigan nai kin enggo lit rih erteran. E maka adi enggo kam man to pedemken ku surambih ah.”

I surambih pe adi isungkun temanna ia, ngkai maka la sahun ngkahe ndai, bagem jabapna. Tawa kerina teman-temanna megisa.

Sebulan kenca si e, reh ka sekalak anak kuta e nangkeng, ndahi ndeharana ras anakna, i pergamberen nari. Iturikenna man si Magar. maka adi ergambir muat nakan, maliken utang entah muat perempo e mesunah.

E maka merhat ka si Magar ergamber ngkahe. Ije erjandi ia maka ikut sekali enda ku batang gamber muat duit. Berngina ikatakenna ka man nandena ras bapana maka sekali enda ikutkena anak kuta pergamber e ergamber ngkahe.

Ije nina bapana, “Labo melukah ergamber anakku. Sabap mekatep bulung gamber iperusi kena kang durina, anakku. E maka labo e saja, sabap gamber ah melas-las nge ierik pelumatsa. E maka labo kam tahan anakku”.

“Adi kerna e bapa, adi tahan kalak, aku gia ija ka tadingku ” nina si Magar

“Adi bage nina anakta e, bereken ia ngkahe, gelah ola pagi erkune-kune ukurna,” nina bapa Magar man nande Magar.

E maka ibas wari perberkat kalak si ergamber e ngkahe, berkat ka me Magar itaruhken nandena ras bapana seh ku darat pulo-pulo kuta. Iberekenna ka me pedah- pedah kuga adi ibas taneh perlajangen muat teman, muat nande ras bapa kitutur, kuga maka jelma ola meling ibahan kalak, ola mekisat man suruhen si biak bibi ras si debanna. Kenca keri pedah-pedah, e maka ibereken nandena bekal i tengah dalan ras ibereken bapana sitik duit, entah nukur kai kari atena sopena denga lit duitna tukur gamber.

Seh ka ibas uruk si mbaru enda ia ngadi, ngadi kalak enda. Sekali enda pe la ka bo ia sahun ngkahe. Kenca lawes temanna ngkahe, rukur ia, kai kari jabapna adi isungkun nandena ia, ngkai maka la sahun ngkahe. Ije ingetna leto la erlayuk.

Berngi agakna enggo kalak mulai tunduh, reh ka si Magar. Sekali enda la nai bo senggetsa nandena. Kenca ia man ibere nandena, nungkun ia nina, “Sekali enda ngkai ka maka la kam sahun ngkahe ndai anakku ?”

“Sekali enda pe la kuakap tengteng warina nande,” nina Magar.

“Ngkai maka bage nindu ?” nina nandena nungkun.

“Sabap kabang ndai leto, kuidah la erlayuk,” nina Magar.

“Kak! kak! kak!” tawa kal bapana. Kalak sedapurenna ras pelepar jabuna pe tawa.

Jenari nina ka bapana, “Ndiganai kin lit leto erlayuk. E maka adi enggo besur kam man, pedemken ku surambih ah”.

Teman-temanna i surambih pe tawa kal megi katana e.

Bagem enggo terberita kerna perngkahe si Magar ibas kutana ras kuan-kuan kalak kerna ia pe seh ku kuta-kuta si deban.

Ije kenca agakna sebulan ka, lit ka anak kutana mulih erlanja i jahe nari. Lit datsa duit ulihna erlanja. I teruh sapo e iturikenna maka arah erlanja enda ngenca murah muat duit, ilanja i gugung nari entah kai barang, seh i jahe idayaken dat duit. I jahe itukur ka barang, ilanja nangkeng, seh i gugung idayaken. I jahe dat duit, i gugung dat duit, nina.

lje merhat ka me si Magar ngkahe. Ikatakenna ka me man nandena ras bapana berngi kerna sura-Surana.

Reh nina bapana, “Labo melukah erlanja ah ndai, anakku. Aku pe rusur erlanja. Entah asakai urat-urat i deleng ah si man dedehen. Mawen-mawen jumpa ka kita nipe sawa galang kal.”

Tapi bage pe nina bapana, igegehina maka sekali enda tuhu-tuhu ikutkenna temanna e erlanja ngkahe. Reh nina nandena, ipeturutlah ia lawes ngkahe erlanja, gelah ola denggo lit kune- kunena.

Erkiteken enggo dua kali la mehuli warina nina man nandena ras bapana, e maka sekali enda isungkun guru, wari keberkaten berkat si Magar ngkahe erlanja.

Ibas wari si enggo itentuken guru, berkat si Magar ras temanna perlanja e ngkahe. Babanna pe enggo itukur bapana kai si murah lako i jahe nina temanna e.

Sekali enda pe itaruhken nande ras bapana ia seh ku darat pulo-pulo kuta. Tapi kenca seh ibas uruk-uruk si ndube ka, enggo ngalah kal iakapna. Barana pe pekepar, enggo akapna mesui kal.

E maka nina man temanna e, “Aku la nai ngasup erlanja enda. Seh i jenda pe enggo meletup barangku, apai denga kari adi enggo seh i deleng ah”.

“Adi la ko ngasup anak, tading i jenda ko. Mulih ko ku rumah, kuga dage ibahan. Adi erlanja enda anak, meletup kin bara, udan pe mawen la tampil udan, las pe la tampil las, bage kin nge muat nakan i babo pertibi enda anak. Adi ntabeh saja muat duit enda labo lit, pala melala kal tading-tadingen nininta,” nina perlanja.

E maka lawes perlanja ngkahe. Kenca gelap wari maka mulih ka si Magar ku rumah.

lje nungkun ka me nandena kenca ia elah man, “Ngkai maka kam la ngkahe ndai, anakku ?”

“La kuakap beluh guru ah ndai ngenehen wari, nande. Maka bage ningku, langa ijapa pe enggo meletup barangku e kawes kemuhen,” nina Magar.

“Ija dage barang lanjanndu ndai anakku nungkun,” nandena.

“I ture nande,” nina si Magar.

“Ningku pe erlanja labo mesunah, Magar. Enda enggo me ikuan kalak kam, anakku. Ningkalak, ‘ola ko bagi perngkahe Magar’. Enggo pe pagi kam mate, seh enggo pe pagi tulan-tulandu melengas, tapi lalap me kam ikuan kalak,” nina bapana.

Sumber :

Seri Turi-turin Karo Beru Dayang Jile-jile.

Disusun oleh Masri Singarimbun & Ngukumi Barus.

(1989)