Menci ras Kaperas

by

Gelgel Menci ndai man ibas kayu ibabo namo, melala buah kayu ije. Maka perban rusur dabuhen buah kayu ku teruh, ipangani Kaperas ka i lau. Ate Kaperas ndai penampat e man bana.

E makana gelgel bage, ikataken Kaperas, “di papalana atendu mekuah, dabuhilah kurang buah kayu ena”.  

E maka idabuhi Menci ndai buah kayu ku namo. Jadi enggo iakap Menci, bagi enggo itamana ngaruh man Kaperas. Kenca bage maka rukur Menci. Lawes ia kuteruh, iamparkenna bana ibas kersik i tepi namo ndai.

E maka sada wari itima-tima Kaperas i namo ndai, lalap la dabuhen buah kayu.

“Ija Menci ndai?” atena. E maka idahna Menci ndai ampar-ampar ibas kersik i tepi namo.

E maka iperkuanken Kaperas, “o teman, kadendu kin mesui, maka kam ampar-ampar ibas kersik ena? Aku sada wari enda tima-tima aku ibas namo ah. Di kadendu mesui kataken bangku, maka kubuat tambarna”.

E reh nina Menci, “di atendu mekuah, buat bangku rimah-rimah nakan anak Raja”.

“E banci,” nina Kaperas.

E maka pepagina ku lau kemahan-kemahan Raja, ibengketi Kaperas tambe-tambe Raja. Dage mulih kemahan-kemahan Raja, la itehna Kaperas ibas tambena.

Seh i rumah, minter iamburken kemahan ndai lau kubas kudin, ngeluso kudin atena. Sangana ngeluso atena, lit kepeken melala rimah-rimah nakan ibas kudin.

E maka ndarat Kaperas i tambe nari ku kudin. E makana itangkapna rimah-rimah ’ndai, itamana kubas babahna, e maka ka minter iulihken ku tambe.

Karabenna ku lau ka embahken kemahan-kemahan Raja ia. Iancuhi ka tambena atena, e maka ku darat ka ia.

E maka ibabana ku Menci, temanna ndai, “enda teman, si nitenahken kam ndube, enggo lit,” nina Kaperas. “Di kurang banci ndarami ka”.

E maka nina Menci, “Enggo cukup!“ E maka ipan Menci sitik si nibabana ndai.

E maka mintes iulihken Menci kudas kayu ibabo namo ndai. E maka idabuhina buah kayu rusur man Kaperas.

Kenca bage rukur Kaperas ka, “dagi, di enggo aku sikali ndarami tambarna, narus mate aku, maka ia pe sikali kusuruh ’ndarami tambarku. Di tuhu kin meriah atena ras aku, tentu ibuatna,” atena.

E maka ibas sada wari Kaperas ndai la nai nggit man kubas teruh kayu ingan Menci man. E maka rusur dabuhi Menci buah kayu ndai, la nai ipan Kaperas.

E maka, “ija nge Kaperas ndai ?” nate  Menci. “Tah kadena ia mesui, maka la ia reh kujenda man?”

E maka itatapna idas kayu nari, idahna Kaperas ndai ampar-ampar ibas ingan Menci ampar-ampar ’ndube. E maka nusur ia idas kayu nari, idahina Kaperas ndai.

Jenari iperkuankenna, “ngkai maka kam la reh sikali enda, kadendu kin mesui?” nina Menci.

“E beltekku,” nina Kaperas.

“Enggo, kai kin tambarna, maka banci kudarami?” nina Menci.

“Dage, di papalana atendu mekuah, buat bangku ate Buaya man tambarku,” nina Kaperas.

Kenca bage, maka lawes minter Menci. E maka rukur ia, “kuga nge ndia pemuatku ate Buaya?”

E maka lit idahna batang tualah ibabo lau, erbuah. E makana inangkihina kudas. Sabap lit buah tualah metua idas, e maka itukakna kubas, jenari iketepna arirang tualah ndai. Mintes ’ndabuh ku namo.

Seh i namo, minter itangkap Buaya tualah ndai, itelenna. Kenca itelenna, seh tualah kubas beltekna. Ndarat Menci ibas tualah nari. E maka iketepna ate Buaya ibas. Jenari ibabana kubas tualah ndai ka.

Sabap mesui iakap Buaya, iutahkenna tualah ndai ka. Enggo ka bombang tualah ndai ibabo namo. Dungna ku daraten tualah ndai, e maka ’ndarat Menci ibas tualah nari. E maka iberekenna man Kaperas ’ndube ate Buaya ndai.

“Maka enda teman, bekas tenahndu ’ndube, di kurang, banci kudarami ka,” nina Menci.

“Enggo cukup,” nina Kaperas.

E maka mulihi ka Menci ndai kudas kayu. Maka Kaperas ka rusur ipanna buah si nidabuhi Menci ndai. E makana meriah ka ia rusur, asa genduwari Menci ras Kaperas meriah rusur.

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pemena)

Disusun oleh J.H.Neumann.

1915.