Ibas Stasiun Gareta Api

by
Kereta api.

Enggo ndekah ate bapa mabai kami kerina ku Medan, gelah idah kami gareta api ras toko-toko kerina ras rumah kalak Eropah ije. Sabap picet dahin, e maka langa terbahanca. Tapi telu ’mberngi ikatakenna man kami, “pepagi ras ita ku Medan!”

E maka minter isikapken nande bekal dua wari, gelah lampas dorek kami lawes. Djenari medem kami kerina.

Pepagina, tekuak manuk, berkat me kami, sabap setengah wari erdalin, maka seh gareta api. Nande arah lebe, jujungna sumpit ras uis kami ibas. Agingku itegu-teguna, sabap langa mbelin ia. Kenca ia, bapa ras aku. Enggo ndekah sitik kami erdalin, latih agingku, kundul atena. Tapi la ibere bapa.

“Tik nari enggo seh stasiun, ingan gareta api,” nina bapa.

Bage gia, iembah bapa ia. Sabap tuhu la nai ngasup ia. Pedas-pedas kami erdalin arah pasar, sabap las kal matawari.

“Tah udan atena kari,” nina nande, “las kal k’idahken matawari e”.

“Mbera ola,” nina bapa, “arah kenjahe gelgel bagenda mokupna”. Kenca bage seh kami i stasiun gareta api.

Stasiun Kereta Api Deli Tua

Stasiun ndai kitik. Maka ningku kitik bagidie, sabap enggo kuidah stasiun mbelin i Medan. Stasiun ndai meganjang sitik inganna. Di kita bengket kubas nuate, lit redan man nangkihen, redan batu, telu tingkahna. Kenca nangkih lit rumah batu arah kemuhun, nteguh kuakap. Arah kawes lit rumah papan sada, man ingan barang-barang.

Nande ras agingku kundul ibas bangku, sabap latih akapna. Kami ras bapa gawah-gawah sitik ije, sabap mesikel aku metehsa, tah kuga rupa stasiun.

“Enda kantor tuan Sep (Chef),” nina bapa. Ituduhkenna kempak rumah batu ndai.

“Oee bapa,” ningku, “tapi ngkai maka ibahanna pintun perikna bage kitik kitik?”

Bage ningku, sabap kuidah lit ije pintun perik, duana kitik-kitik, agakna sada esta kenca bukana; arah lebena lit papan, bagi meja.

“Pintun enda, e me kap ingan nggalar tambangen gareta api,”  nina bapa. “Ogelah surat si nisuratken ije”.

Kucubaken ngogesa, suratna arah kemuhunku, nina : Kelas I dan Kelas II, ibas si arah kawesku : Kelas III.

“Kai e bapa?” ningku.

“Banci kuterangken,” nina bapa, “begiken dage! Ibas gareta api lit telu erbage gareta ingan kundul kalak. Sada erbage, mbelin tambangenna, ibahanna gelarna kelas si pemena (Kelas I). Lit sada gareta ka ras ingan kundul, kurang mbelin tambangenna, eme kap kelas si peduaken (Kelas II). Janah lit ka gareta ras ingan kundul murah tambangenna, gelarna kelas peteluken (Kelas III).

“Adi bage, enggo ku-erti bapa. Tapi kubas kelas apai kita?” ningku.

“Kubas kelas si peteluken, sabap arah e biak ginemgem kerina,” nina bapa. E maka idahi kami ras bapa ku pintun si kitik ndai, suratna Kelas III.

“Ku Medan,” nina bapa, “kami dua kalak tua-tua, anak-anak pe dua”.

E ibereken tuan Sep man bapa empat lambar kertas, karcis gelarna. Tapi ibas dua kuidah iguntingna setengah. Kenca bage igalar bapa, tah asakai galarna la kuteh. Minter kusungkun bapa, ngkai maka iguntingna karcis si dua e.

“Maka iguntingna,” nina bapa, “sabap sitengah lambar ertina anak-anak empuna. Tambangenna pe setengah ngenca”. Jenari kuidah maka mehuli ibuniken bapa karcis ndai ibas petak, sabap karcis ndai, nina, tandana maka enggo nggalar. Adi bene la ibere Kondektur kami kubas gareta kundul. (Kondektur e me kap tuan si ngikut rusur ras gareta api, ia pe si mulkasa ras mintusa.).

Kenca bage lawes me kami ngenehen gareta api, sabap reh ia. Ndauh denga, langa tangkas teridah, tapi arah cimberna itandai ia reh. Meter perdalirnna bagi angin meter, sorana pe lit: “toem, toem, toem!”

Enam, enggo ngadi ia, bagi kuda enggo latih, mbelin kesahna. Enggo susur Kondetur ipulkana pintunna kerina.

“Deli Tua! Deli Tua,” nina megang sorana ibahanna, maka iteh kalak si nibas gelar stasiun enda. Nusur kalak kerina, enteram ia : kalak Eropah, Cina, Jawa, Karo. Dilaki diberu, danak-danak, tua-tua, nusur kerina.

Lit tukang Cina babana perpencana, lit Jawa maba bungkus. Karo maba ikan ras minak gas. Gejek nari. Pedas-pedas lawesen kerina, ipernehenna barangna, gelah ola ketaktaken tah kebenen.

Nande ras agingku mbiar, sabap langa idahna gareta api. Tangis pe agingku.

“Ibas gareta apai kita kari bapa?” ningku nungkun.

“Ibas kelas si peteluken. Apai idah kam kari suratna III, kuje kita,” nina bapa. Jenari erkata lonceng. Tuan Sep malusa.

“E tanda ngatakenca nangkih gareta,” nina bapa, “ota kuje kita”.

E maka kubas kami ras nande pe. La nai ndekah nari, tuan Kondektur mintu pintunna. Reh ka kalak Cina, Jawa, Karo pinger mekelek. Kubas kerina pe. E maka erkata lonceng ka, tuan Kondektur ersiwel-siwel takal, gareta api erkata ka, jenari lawes kami, ku Medan. Tah kai idah kami i Medan, sikali  nari, kuturiken man bandu.

Sumber :

Erbage-bage Toeri-toerin. Soerat Ogen Man Danak-danak Sikolah i Taneh Karo.

(Penggel si Pedoeakan)

Disusun oleh J.H.Neumann.

1915.