Dahin Si Kitik La Terdungi

by
ilustrasi : Pria Karo
ilustrasi : Pria Karo

Gelarna si tuhuna, si Pola,. Tapi la nai pang kalak nggelarisa sabap enggo lebih lima puluh tahun umurna. Nande ras bapana enggo mate. Turangna ras seninana sada nande sada bapa la lit. Dauh bapa ras dauh nini ngenca lit. Ayona enggo ibenakenna ringut-ringut. Asem enggo dekahna idahna wari terang, tapi sekali pe la empo.

Erkiteken enggo mehangke kalak nggelarisa, e maka urun-urunna saja ibahan kalak, e me Pa Kelto.

Kai dalanna maka Pa Kelto la erjabu? Rupana la mehuli? La beluh ngerana mehamat? Entah la terbuatca perunjukna? Labo bage dalanna maka la ia empo.

Si tuhuna dagingna mbestang. Rupana mejile. Kerina singuda-nguda diberu mbaru mberkat e pe merhat nge isungkunna. Ngerana pe medurma kal babahna. Erta-erta tading-tadingen urang tuana pe lit nge. Janah ia anak sada-sada ka ngenca. Bagendam asum ia paksana metunggung jadi anak perana. Tapi genduari pe min anak perana nge ia, tapi anak perana si enggo meteras.

Genduari enggo erbarung ia. Rumah tading-tadingen nande bapana isuruhna kalak ngianisa, gelah ola meter ceda.

Pagena bekasna ku juma, la kerisa nakanna tep-tep tahun. Manukna pe melala ibarungna e. Kambingna pe lit nge lima ah. Lembuna pe lit nge sada man penenggalana.

Penah lit ngena atena sekalak diberu anak kalak jore. Nggit nge diberu e isungkun man bana. Tapi la tek Pa Kelto, maka nggit diberu e man bana, erkiteken dahinna ku juma jenari ku rumah tep-tep wari

Erkite-kiteken la tek Pa Kelto nggit diberu e man bana, e maka sereh ia man kalak jore. E maka ngandung kal Pa Kelto, kenca ibegina enggo tersereh diberu e.

Dungna isungkunna si deban. Nggit kalak, la atena bage. La kalak nggit, merhat kal ia. Endam dalanna maka seh enggo metua ia la erjabu. Seh nande ras bapana idilo Dibata, lalap la ia erjabu.

Lit kalak si beluh ngenen retak tan ngatakenca, maka lit kengalenna. Kengalenna enda arus ibuangken, maka banci erjabu nina. Sekali enda ibuangken me kengalenna e, nina ukurna. Dahin si kitik nge min, labo mbue belanjana tapi la ka bo tersahunken.

Kenca ia enggo erbarung si sada-sada nerap-nerapken bana, numpah-numpah padan, wari tiga kenca ku tiga ia nukur sira, ikan, tah pe kai ia perlu denga. Ibas ia gawah-gawah i tengah tiga, idahna sekalak dilaki paksana ngenehen rika tan diberu. Nterem kal ije jelma dilaki diberu pulung, ngenen retak tanna atena. Jadi ban teremna tentu sada-sada ngenca ternehenca retak tan e.

Turah ukurna, maka ia inehen ka sekali nari retak tanna. Ija kal nge salah benangna maka enggo metua lalap la empo, seya ibahan la kalak nggit, nina ukurna. Bicara ibereken gia sitik duit man guru tentu labo akapna dalih, erkiteken lit duitna.

Dungna seh me paksana Pa Kelto inehen guru e retak tanna. Ituriken guru e kerina kegeluhen Pa Kelto. Payo kal iakap Pa Kelto penuri-nuri guru e. Nina guru e, maka nai asum ia ibas bertin merhat nandena man manuk megara ras cimpa bicara siang, tapi la sahun. Em jadi kengalen, janah kengalen e man buangen. Aminna gia umurna enggo seh lima puluh tahun, adi enggo ibuangken kengalen e, minter kari lit diberu nggit man bana, janah ia pe minter kal kari erbunuh ukurna, nina guru e.

Jenari nina ka guru e, maka jari-jari tanna, tuduh-tuduh kemuhen cincini alu cincin pulung-pulungen sangkep nggeluh, e me anak beru senina ras kalimbubu. Jenari kenca pagi dung, ipukulken lebe maka ipake. Janah pukulenna pe labo mesera nina guru e, cukup cimpa siang saja.

Ben wari mulih Pa Kelto ku barungna. Papagina idahina anak beru, senina ras kalimbubuna, ikatakenna kata guru e. E maka minter kal sangkepna nggeluh mereken duit tersitik-sitik penukur cincin e. Gelah min enggo kal ia erjabu, nina kerina sangkep nggeluhna.

Cincin enggo dung, enggo ipakena. Tapi kengalen lalap la ibuangken. Janah cincin pe lalap la ipukulken.

Piga-piga bulan kenca dung cincinna e, reh sekalak permenna, erkiteken si mupussa, anak mamana. Isungkun Pa Kelto, kai ate permenna. Maka ia reh nina erkiteken isuruh bapana ia nungkun, kuga enggo muang kengalen ndai ras enggo me ndia cincin pulung-pulungen ipukulken.

Ije nina man permenna, “Enggo dung permen, enda kap.” lcidahkenna cincin e, enggo ipakena ibas jari-jari tuduh-duduh tanna si kemuhen.

“Enggo ibuang kin kengalendu ndai?” nungkun permenna.

“Ah permen, la nai bo kuakap terbuangken e asa lalap. Sabap pudun-pudun ngenca rusur lit, tapi sahun lalap lang. Kuakap kengalen enda enggo ka kengalen perbahan lalap la terbuangken, permen,” nina Pa Kelto.

“Kerna cincindu ena, enggo ipukulken. bengkila?” nungkun permenna.

“Langa permen,” nina Pa Kelto.

“Mesera kin pulungenna, adi mesera gelah kukataken man bapa, bengkila,” nina permenna.

“Labo min mesera permen, tapi la terbuat aku,” nina Pa Kelto.

“Kai kin, bengkila?” nungkun ka permenna.

“Cimpa bicara siang, ma mesunah kal nge permen, tapi ise nutusa?” nina man permenna.

Ndekah sinik kal permenna e. Anakna si diberu pe la lit nutusa. Beberena diberu pe la lit. Permenna diberu pe la lit. Adi anakna dilaki pe la lit, tentu permenna erkiteken ndehara anakna, pe la lit. Turangna sembuyak pe la lit, tentu beberena si diberu pe lalit si nutu cimpa. la nggeluh i barung-barung ka.

Merendeh ukur permen na kerna nasip bengkilana. Kai pe labo min kurang, tapi dahin kitik-kitik kal pe la terbahan. Je kepe dahin enda labo muat belinna adi terdalanken. Labo perbahan kitikna, kitik gia adi la terdalanken.

Perbahan merendeh pengenehen permenna, bengkilana pe naktak iluhna.

( Tuhu kin ndia lit kengalen e ? )

Sumber :

Seri Turi-turin Karo Beru Dayang Jile-jile.

Disusun oleh Masri Singarimbun & Ngukumi Barus.

(1989)

Turi-turin Karo “Dahin Sikitik La Terdungi”.
Penutur cerita : Anggy Beru Karosekali (Seberaya).
Sumber : Tralikatara