,

Bilang-Bilang Riwayat Prof. Dr. Henry Guntur Tarigan

by
Prof. Dr. Henry Guntur Tarigan
Prof. Dr. Henry Guntur Tarigan

Oleh Prof. Dr. Henry Guntur Tarigan.

Emaka hio kute ndube bilang-bilang kin pe, bilang-bilang anak Tarigan Mergana, si nitubuhken nande beru Karo si melias la nai teralang, i kuta Linggajulu si tergelar “padung-padungna simbelahen” si ertapinken lau si ngincuah la teralang si ertanggaken melala la teralang, kenca ridi seh i tampe-tampe kuta jadi panasen ban latihna, asakai si bangger jadi malem enggokenca kin ngasup ridi ku tapin.

Kenca isurungi alu belo cawir janah ididongdoahken nande beru Karo si melias si perkeleng la teralang, emaka reh piah-piah reh belinna reh gedangna me anak Tarigan mergana, piah-piah la tergejap enggo banci pepulung tai babi tiap erpagi-pagi, janah peluar lembu ku juma dingen muat gagatenna.

Seh paksana, hio kinkute ndube, itaruhken bapa Tarigan mergana me anak Tarigan mergana sekolah ku Lingga, janah perbahan tanna si kemuhen ndube langa seh ku cuping si arah kawes, maka menam-menam me anak Tarigan mergana la banci ialoken jadi anak sekolah i Lingga, adi la kin ibeluh-beluhi bapa Tarigan Mergana ngerana, singataken man opsinar maka anak Tarigan Mergana sintergelar si NgGuntur tubuh tahun 1933 tapi situhuna ibas tahun 1935 nge.

E maka bilang-bilang kin pe ndube rikutken toto janah keleng ate bapa Tarigan mergana, Tariganna Tarigan Sibero, ras nande beru Karo, Karona Karo Surbakti, jadi me si Ngguntur sekolah ku Lingga napaki la ersepatu teptep wari ras teman-temanna i Surbakti, i Simpang Empat nari, jumpa-jumpa ras sirang-Sirang i Simpang Seruduk.

Emaka la me tergejap seh ka me paksana sekolah ku SMP Negeri Kabanjahe ibas tahun 1948. Anak Tarigan mergana me si kitikna ibas kelasna, ersepatu pe lang, langa kal meteh mejile, langa meteh mela, si man tawan teman-temanna, si man cirumen guruna si beluh la teralang si tergelar Rumani Barus ndube.

[Baca juga : Rumani Barus, Dari Ketua Permata Hingga Menjadi Anggota Konstituante Republik Indonesia (1956-1959)]

Emaka, o turang teman senina merga si lima, perbahan iakapken anak Tarigan maka nande bapana labo ngasup, emaka sekolah me ndube anak Tarigan mergana ku Sekolah Guru A (SGA) Negeri Medan. Perlebe tading me anak Tarigan mergana bebere Karo i Kampung Teladan, napaki me tettep wari ibas sada tahun ku SGA si dauhna labo kurang ibas enem batu nari. Perbahan latihna, e maka tading me anak Tarigan mergana ras mama Satur Sinulingga i Jalan Malaka, janah kenca sekolah ikut me erbinaga sayur i Pusat Pasar Medan. Dungna ipaksa me anak Tarigan mergana masuk asrama i Jalan Serdang Medan ilebe-lebe rumah sekolah SGA kin pe ndube.

Emaka, o turang teman senina, seh me paksana ujian terakhir, ujian Bahasa Indonesia sada gelarna, emkap ujian mengarang. Ikut me anak Tarigan mergana ujian, kenca sepuluh menit kundul, ku darat me ia kenca iberekenna man singuji. Emka hio kin pe ndube bilang-bilang anak Tarigan mergana si tergelar gutul i asrama idilo guru bahasa Indonesia si tergelar Abdullah Lubis me anak Tarigan mergana ku kantor, irawai, iisak-isakken guru ndai me anak Tarigan mergana, perbahan tempa-tempa la atena tutus ujian e, buktina langa pe dem paksana enggo ndarat.

Emaka erjabab me anak Tarigan mergana : “O bapa, guruku simelias si ngajari aku jadi jelma si mehuli, labo ateku njuruken kam, labo ateku la lulus, o bapa! Aku ndarat nadingken ruangan ujian perbahan enggo me kueteh tangkas maka aku enggo dung erbahan karangan, emkap karangan puisi tah pe ndungdungen si sepuluh baris ngenca gedangna, sebab judul siman karangaenku enkap “Panggilan Laut” janah labo lit larangen ibas ngarang e erbahan puisi, emaka ula kam merawa bapa, keleng min atendu aku!” Dungna mambar me ukur guru Abdullah Lubis janah cirem me ia, la nai merawa terus man anak Tarigan mergana ndube.

Kenca lulus ujian SGA, iangkat metuhu anak Tarigan mergana jadi guru SGB Negeri Seribudolok, taneh Simalungun erkelang-kelangken deleng Sipiso-piso iteruh deleng Singgalang jine. Telu tahun dekahna anak Tarigan mergana ngajar ijah ngkeriken ikatan dinasna.

Emaka perbahan belinna sura-sura jadi jelma si beluh, ibas bulan waluh tahun 1957 berkat me ndube anak Tarigan mergana ras temanna beru Purba erkapalken kapal Kalianget mentasi lawit simangko-angko ku taneh Jawa nandangi kota Bandung kuliah i Perguruan Tinggi Pendidikan Guru ndube, jurusen Bahasa Indonesia.

Kenca nggeluh erpala-pala bagi kurmak sampe rakit lulus me ndube Mama Tigan sarjana muda ibas tahun 1960, terus iangkat ia jadi assisten dosen janahna kuliah, janah lulus ka me ia ujian sarjana ibas tahun 1962, janah jadi me sekalak dosen i IKIP Bandung ndube.

Turang, teman senina si rulo, wari jadi bulan, bulan jadi tahun, la tergejap piah-piah seh me tahunna sepuluh kenca lulus ujian sarjana e, ibas tahun 1970 ikirem pemerintah me tuhu Mama Tigan ku Negeri Belanda, ku kota Leiden jine, erlajar nambahi pemeteh ibas Universitas Leiden telu tahun dekahna. Emaka tading me ndube Mama Tigan i Asrama Rumah Zending i kota Oegstgeest.

Kepeken kerina enda tuduh-tuduh ibas Dibata nari kal nge. Ibas asrama enda me Mama Tigan sempat nggargari buli-buli cakap ras adat Karo sini buniken kalak Belanda ibas majalah-majalah si adi. Mawen-mawen la me igejap Mama Tigan iluhna mambur itengah berngi simbages ngoge turi-turin si adi si nisuratken pendeta Joustra ras pendeta Neuman ndube. Enggo me tuhu iakap Mama Tigan bana i Taneh Karo Simalem i taneh Belanda taneh perlajangen e.

Emaka bilang-bilang kin tuhu ndube, gendek me ranan mulih me Mama Tigan ku taneh Bandung panteken kalak Sunda si la emerga ndube ibas tahun 1973, janah dua tahun hari ibas tahun 1975 lulus me tuhu Mama Tigan ujian doktor bahasa ibas Universitas Indonesia; janah Mama Tigan me doktor persepuluhken lulus ibas Fakultas Sastra Universitas Indonesia kidekahna pajek gelgel e nari, janah doktor pelimaken kalak Indonesia, perbahan pemena nari seh pelimaken, doktor kalak Belanda kin jine.

Toto bapa Tarigan Mergana si mehuli, nande beru Karo si melias, janah enggo kepeken peraten Dibata, emaka kenca sepuluh tahun lulus doktor ndube, ibas tahun 1985, iangkat Pemerintah Republik Indonesia me tuhu Mama Tigan anak Linggajulu si simbelahen padung-padungna ndube, jadi guru si maka si tergelar Guru Besar tah pe profesor i IKIP Bandung.

O, Taneh Karo Simalem, Taneh Merga Silima, tedeh ateku, genduari enggo aku reh erjimpuh i lebe-lebendu, kenca Mama Tigan erlajang telu puluh tahun dekahna. Gia aku enggo ndekah mampa-mampa mehuli ukurku, tedeh ateku, ngena ateku nandangi kena sitik pe labo pisik, emaka alo-alo kal Mama Tigan, ola kal iban kena Bebere Karo enda sumpamana layam-layam tangke ndangkaholi ndube, si bene la kenan daramen, si naktak la kenan jemputen, si mombak la kenan tangkapen ndube, ateku jadi, turang beru Merga Silima, tami-tamin Tarigan mergana. Ajari kena kal aku perbahan cakap Karo-ku enggo me tuhu betat-betat, maka kueteh adat si mehuli mulihi, rikutken ate kena jadi, maka ola kal pagi lit ceda ate senina, anakberu ras kalimbubu nandangi anak perlajang enda.

Dage sibar em lebe bilang-bilang Tarigan Mergana anak perlajang, i ja salah lepakna ola kal tama-tama ku pusuh, mejuah-juah kam kerina si ngoge bage pe si megi-megisa.

O, Taneh Karo, taneh si mehuli, inganku tubuh…….
kekelengennku.

——————

(Potongan bagian dari materi makalah yang berjudul “Bahasa dan Budaya Karo” yang disampaikan oleh Prof. Dr. Henry Guntur Tarigan pada Seminar “Kebudayaan Karo dan Kehidupan Masa Kini” yang diadakan tanggal 23-25 September 1985.)

Sumber :

Bungai Rampai Seminar Kebudayaan Karo dan Kehidupan Masa Kini. Editor Drs. Sarjani Tarigan.